|
|
Екуннин э’ӄэтэгинӈыльын гатанӈыма, эрмэчьу лынъё, мурык рамкэты рамаравӈыгъат. А’ӄамараквъат. Куннин-ым рэмкын. Рыпэт ӈыроргарэ аёгты пэлянэнат, гэйичьэмэ ӈирэӄ Лявтылывальын ытри Чыкэгрэв. Чымӄыл-ым ӄол, йъэлгытомгычгын. Ытръэч-ым гэӈирэмъэмитэ, гарыннымъамэта нъэлгъэт, ӄутти гэткулинэт ымыльо, эмӄэгнэвэ. Ынӄэната айылго лыӈкы паагъат, гынтэквъэт. Атаӄъака нутэк нъалыӈӈогъат, ӄопӄатыӈӈогъат. Иквъи ынӈот, ивнин Лявтылывальына Чыкэгрэв:
- Ынпычьигым! Опопы ы’ттъыёлягты амгымнан мыгагчавакватгъак. ¹рэӄ ярак мыпкиргъэк, турык рыягнавкы таӄъанльататыльыт мынгагчаватынат.
Эквэтгъи. Танӈыт-ым ытръэч катам мынгыткэн нъэлгъэт. Екуннин а’ӄатагэнӈыльычгын гэккэлӄыле, аталтанӈэпы рымайӈавъё эккэлӄыл, илгымыргэвыльыт, ӈирэргэри, йъаяпэральыт, ы’ттъыёл эмчейвэ кылявыркыт, ӄутти-ым яачы таӄъайӈагъат. Гаглытыляркыт, ӄынвэр атаӄъакыльыт ӈирэӄ найъонат, гэӈирэӄмъэмилинэт. Нивӄин Чымӄыл:
- Гу! Наранмымык! Мынорвыйпымык!
Ӈыроӄ орвыт ачгыта нэтрилынэт, йыпыянво. Пирӄыгъэт яачы, гынрыру лыгнинэт эймэвыльыт. Екуннин э’ӄэтэгинӈыльын гаккалӄылма пыкиргъэт. Вэтчагъэ, гырголягты пиӈкугъи Яконнэчгын, катам гээвмэл. Эмӄынпиӈкук льолӄылыйпыян янра рытчыркын. Панэна ныпиӈкучитӄин, мыргэвтэлет чечгэӈчыкойпы янръатгъат. Иквъи Чымӄыл:
- Ии! Гынан-ым ӄылӄэгнэквын!
- Ельо! Гынан!
- Ээ! Мачынан гымнан!
Рынныкон пиринин, ырыт. Ивнин ынӈот Чыкэгрэвынэ:
- Катам гытолгэпы ӄынпыткэквын, мэӈӄъом эвыр панрэватгъэ мыргэв!
- Яв-яв! Льолӄылыйпыян йытычьэтыркын. Этыӄун кытрэлгыпы мынпыткэквъэн!
Ваарват тиӈунин рылпык рымагты. Ток! Пэӄэтатгъэ Екуннин, тэтъын-ӈан въэвъентогъэ. Накытгынтыпэнрыгъан ӈирэнлеӈу. Чымӄылена илгымыргэв йыннин, ынанчинит йымнэн, ымыльо элгыйъаяпылвынтыавэръыгыргын. Танӈырымайӈавъё гынтэквъи, танӈыт-ым кынмал. Таӄъы нэймитгъэн. Ынкатагнэпы паагъат а’ӄамаравкы. Ытръэттэгын.
|
