|
|
К’аалватэвъян, кырн’атэвъян эвыр-ым
Ынанкэн-ым ынк’эн, ынанкэн-ым ынк’эн! Гынэнайн’ын таткаён’ыйн’ын гапрорма тытин’угъэн, к’ыятлепы тыгтогъан, гымык тытчыгъэн! (Катам энантантэнвыкэн въаглын’ык’ай, эвыт лымн’э /эвлымн’э/ уттык’эй, ръэнут, нинэпирик’ин вэтгавма, лиличыку н’ирэк’ гэнтэ. Ярак пыкиркин, к’ол пэнъёлгыкэн рытрэлъёлк’ыл, к’ол ээкэгйит йымэёлк’ыл, тачымкэчгынъёлк’ыл). Ынанкэн-ым ынк’эн, ынанкэн-ым ынк’эн! Калеляйн’ын тытин’угъэн, к’ыятлепы тыгтогъан, э’нъёчго тыйпатгъан. Ынанкэн-ым ынк’эн, ынанкэн-ым ынк’эн! Аталвэнк’оро тытэйкыгыт! А’мын-ым мин’кыри! Тн’агыргырамкэты к’легрэргэ! Ынанкэн-ым ынк’эн, ынанкэн-ым ынк’эн! Йъэчгатэн экык рэтгъэн! Ынанкэн-ым ынк’эн, ынанкэн-ым ынк’эн! Тн’эск’эрэмкин экык рэтгъэн! Ынанкэн-ым ынк’эн, ынанкэн-ым ынк’эн!
Тн’агыргырамкэн экык рэтгъэн! Ынанкэн-ым ынк’эн, ынанкэн-ым ынк’эн янрайъэн экык рэтгъэн! Ынанкэн-ым ынк’эн, ынанкэн-ым ынк’эн! К'оон'аглынолгык тытчыгыт!
Ынанкэн-ым ынк’эн, ынанкэн-ым ынк’эн! Куун’эйык тытчыгыт! Ынанкэн-ым ынк’эн, ынанкэн-ым ынк’эн! Мэйн’ын’эйык тытчыгыт! Ынанкэн-ым ынк’эн, ынанкэн-ым ынк’эн! Мэйн’ык’энъевык тытчыгыт! Ынанкэн-ым ынк’эн, ынанкэн-ым ынк’эн! Н’алгылвыквыкамчетча эчычевытрыкэ тытчыгыт! Ынанкэн-ым ынк’эн, ынанкэн-ым ынк’эн! Н’алгылвыккамчетча эвичувытрыкэ тытчыгыт! А’мын-ым мин’кыри! Выква тыргыткынатгыт! А’мын-ым мин’кыри! Гынонканой! Таляквыйн’ын к’инэйылги! (Н’ачгымынга гэпиритэ). Н’отк’энына айвавытгырык мытрилгъэн! А’мын-ым мин’кыри! Майн’ыгытгык тытчыгыт! Ынанкэн-ым ынк’эн, ынанкэн-ым ынк’эн! К’уйвирынн’эт эчычевытрыкэ тытчыгыт! А’мын-ым мин’кыри! Гынонканой! Айвыйн’ын к’инэйылги! Н’отк’эн мыльэйвэтгъэн. Н’алгыл к’аатагна тэнтильын! Кэтэм плыткук, нэнагтатк’эн ярагты н’элвыл. Мэн’к’о ёо варкын, айвачы нынтакан’атк’эн, гивэ : « Гымнин н’ычвайыткэк’ай к’ыйн’огын, ямыкаткэк’ай гымнин к’ыйн’огын! » Вытку, тымыплыткок, руплыткук, винввъэймит ы’мынчывэтык нинэнлывэтк’ин. Тымын’н’ок, гырын’н’ок, ратамычгын нэнанрыратк’эн рагролмык. Ынкаткынык тымъёлк’ыл, нэмэ рыванн’ыёлк’ыл ратамыткынык. Айгоон эвъянватыплыткок, лыги нинэлгык’ин рэквыт н’эвъэнлык’ыл, чимгъутэ, к’элелвынэ нивк’ин: « Н’отк’эн-ым н’эвъэну ритгъэ! » Эвъянватыплыткок-ым (к’аалвылё), рыннэн нинэтэйкык’ин к’этвынэн’. А’м рынна нинэк’этвык’ин, гаворвык’ая-ым нинэтэйкык’ин к’этвынэн’. Нэмэ н’эвъэн ныныйтъатк’эн яачы. Ачгыта ратамыткынык нытрилк’инэт. Ныгакан’к’оолгатлен-ым к’аалвылё. Ынкъам порэрэты нинэквутк’ин, еп атынпыка. Ынкъам н’авъанчын’ын ныкамлелёйпык’эн. Чен’эт-ым к’аалвылё ынн’ин н’утри нытвак’эн, ек’аак’ нинэнчумэтк’ин н’ававынральа, нэнапатчаёк’эн кэмлилючыку, катам тынпын’н’ок. Ынн’атал мэткиит нэнатынпык’эн, ы’вак’очейн’а. Н’эвъэн-ым валята нэнанмык’эн. Тымыплыткок, к’оръачоолга нинэныттувк’ин. К’ынур к’оран’ы, нивк’ин: К’к’рр! Нытэн’въик’ин-ым, нэнаворвыткок’эн, ек’айпы нэнамгок’эн, гамгатывтыв нинэнпэлк’ынтэвк’ин, к’аптэйпы нинэгрулмык’ин вытры гыткагты, н’ачгымынга вэриврилк’ытъул а’тав пытляк’ы нинэнук’ин, эвыт лымн’э попокалгын, эвыт ръэнут вальын, мыймыглын’ын, эченур нутэск’ыкин ръэнут, танрогты вальын. Лымынкы мутлымул вак нутэск’ык гытамо нинэлгык’ин. Нивк’ин: « К’улиникэк ынин н’инк’эгти у’рэтык нотагты эмтэгъен’ыльу ринн’ыт!» Ынн’атал нэнанатвык’эн ымыльо, нэнапатъёок’эн аръаля, чен’эт-ым винрэтыльыт нымкык’инэт. Авынральа гэмгэтэкичгытъулк’эй нэнатаан’к’эн янот, эмыннэн рэлюуръык’эю. Эвын ныпампычетк’эн ынръам чичгынчыку ган’авъанма авынральын. Так’оран’ыплыткотовэкэн’ык, имыръэнут этлы этрыткукэ ынан чинит, тайн’о нинэлгык’ин эвъян-ым. Энмэн нинэтрыткук’ин, нылк’ытк’ин к’оран’ы. Нэмэ рамкэпы этлы мэн’к’оры элейвыкэ, юрэк’ н’ойн’оглын’ын рэмкык рэнэрэнн’ынин ынин чиниткин. Нэмэ ынк’эн э’тки. Ынн’атал ынк’эн ытръэттэгын.
|
